LARITRET

Janvié 2020

Anpami tout sé péyi Léwop la, apré Lépéyiba, sé atè Lafrans sé granmoun-lan plis alez. Adan tout sé lézot péyi-a, granmoun ka wè lanmizè.

Mi anvwala, sé gouvelman Léwop la désidé moun ki rich pa ni asé, moun ki pov ni trop. Kidonk, yo ka éséyé bésé ritret sé djoubakè-a.

Sa ki ka rivé atè Lafrans, sa ja rivé atè Wayom Ini, mé sé solda-difé anglé a fini pa fòsé lajistis fè gouvelman-an tjilé.

Lanné 2013, gouvelman Wayom Ini a désidé chanjé ritret sé solda-difé a :

*Avan, yo té ka pran ritret-yo lè yo té ni 50 oben 55 lanné mé gouvelman-an désidé sé selman lè yo ni 60 lanné yo pé pati, magré moun ki ni 60 lanné pé pa fè travay-la ankò. Si yo pa kapab, yo ké ped plas-yo san pies ritret avan yo ni 60 lanné.

*Epi, gouvelman-an désidé wosé sa sé djoubakè-a té pou péyé chak mwa pou ritret-yo, mé ritret-yo té ké bésé.

*Gouvelman-an di kon sa, nouvo model larel-tala pé ké bon pou sa ki za la, mé i ké bon pou sé jenn-lan ; sé djoubakè-a di yo pa dakò pies toubannman épi zafè diviser pour régner kon yo ka di.

Dépi 2013, sé solda-difé a ka fè lagrev, kat jou, uit jou, dé jou, an jou, yo goumen toulong. Yo fè pasé 50 lagrev.

Sendika-yo désidé mennen gouvelman-an douvan lajistis. La cour d’appel fini di kon sa, sendika-a ni rézon ; manniè diviser pour régner tala pa légal padavwè sé an discrimination kont lajénes.

Kidonk, aprézan sé 6.000 solda-difé a sav yo ké ni an ritret ki pres bon.

Sé majistra-a, sé polisié-a, sé jandam-la, yo ja genyen douvan lajistis. Aprézan, tout sé djoubakè-a ki ka travay ba léta ké pwofité di désizion-tala. Gouvelman-an ké blijé péyé chak lanné pasé 4,5 milia léro pou sé ritret-la.